Жаңалықтар

Бүгін университетімізде саясаттанушы, тарихшы Жандос Қарынбаевтың «Қазақ-поляк байланыстарының тарихынан 33 айғақ» тақырыбында дәріс сабағы өтті.

Дәріске университеттің профессор-оқытушылар құрамы мен студенттері, сондай-ақ Түркістан қаласы мен облыстың зиялы қауым өкілдері қатысты.

Авторлық дәріс ғылымды, ұлттық бірлік пен берік этносаралық қатынастарды насихаттауға бағытталды. 

Жиын барысында екі халықтың ұлы тұлғалары арасындағы тарихи байланыстар арқылы ел тарихы жаңа мазмұнда таныстырылып, тың тарихи деректер ұсынылды. 

Дәрістің ғылыми негізін «Қазақстан поляктары: қалыптасу тарихы мен бүгіні» және «Қазақ-поляк байланыстарының тарихы танымал тұлғалардың мысалында» атты еңбектер құрады. Аталған зерттеулерде екі халық арасындағы тарихи сабақтастық нақты деректермен ашылды, танымал тұлғалардың өмір жолындағы өзара ықпалы толық бейнеленді.

Қазақстан Республикасы Тәуелсіздігінің 35 жылдығына арналған дәрісте Шоқан Уәлиханов, Әлихан Бөкейханов, Қажымұқан Мұңайтпасов сынды тарихи тұлғалардың өмір жолындағы поляк жұртымен байланысты маңызды кезеңдерін талдады. 

Жандос Қарынбаев қатысушыларға қазақ-поляк қарым-қатынасының тарихтағы маңызды сәттерін жан-жақты жеткізіп, екі халық арасындағы мәдени және тарихи сабақтастықтың мәнін сезінуге мүмкіндік берді. 

Шара студенттер мен зиялы қауым үшін тек тарихи деректерді ұсынумен шектелмей, ұлттық бірлік пен өзара түсіністіктің маңыздылығын насихаттауға септігін тигізді.