Жаңалықтар

Университетімізде студенттер арасында «Құқықтық сана және жастар: Заң мен тәртіпке көзқарас» тақырыбында дөңгелек үстел өтті. Іс-шара Заң мен тәртіп концепциясы мен жаңа Конституциялық референдум аясында ұйымдастырылды.

Жиынға Заң факультетінің деканы Әлия Қасымбек пен оқытушылар, факультет студенттері қатысты.

Басқосуда сөз бастаған декан Әлия Қасымбек: «Құрметті студенттер, бүгінгі талқылайтын тақырыптар – күн тәртібінде тұрған өзекті мәселелер. Конституциялық құжаттың мемлекеттік деңгейдегі маңызын баршаңыз жақсы білесіздер. Сіздер, еліміздегі жаңа тарихи қадамға куә боласыздар. Референдумда дауыс беріп, азаматтық белсенділік танытасыздар деп сенемін. Болашақ заңгер ретінде мемлекеттік маңызды іске бей жай қарамай, жауапкершілікпен қарауларыңыз қажет. Болашақта маман ретінде қабылдайтын шешім мен істейтін жұмыстарыңыз сол қабылданатын Конституция аясында жүзеге асады»,-деді. Осылайша, жастарға жаңа Конституциялық реформаның маңызын тереңінен талдап түсіндірді. Ел болашағын ойлайтын әр азамат бұл тақырыптың салмағын саралай алуы тиіс екенін тілге тиек етті. Туған жердің тыныштығын сақтау, қадірлеп қастерлеу әр перзенттің борышы екенін баса айтты. Сондықтан білімгерлерді «Заң мен тәртіп» қағидаттарына бағынуға, оны сақтауға шақырды. 

Келесі кезекте, декан орынбасары, PhD, оқытушы Жандос Ибраев: «Біз жастарға сенеміз. Сіздер, болашақ заңгер ретінде  халықтың игілігіне арналған заң қабылдайтын орындарда қызмет атқарасыздар деп сенемін»,-деді. Сондай-ақ, құқықтық сауаттылық пен мәдениет мәселелерін көтерді. 

 Спикер өз сөзінде заңгер мамандығының жауапкершілігі жоғары екенін атап өтіп, әрбір қабылданатын шешім ел тағдырына әсер ететінін еске салды. Ол жастардың құқықтық санасы мықты болса ғана әділетті қоғам қалыптасатынын айтып, білім мен адалдықты басты қағида етуге шақырды.

Жиын соңында студенттер өз ойларын ортаға салып, құнды пікірлерін айтты.