Жаңалықтар

Бүгін оқу ордамыздың Мәдениет орталығында «YASAWI ЖҰЛДЫЗЫ-2024» атауымен белсенді студенттерді марапаттау рәсімі өтті. 

Іс-шараның басты мақсаты – 2023-2024 оқу жылы көлемінде университет қызметіне және қоғамдық жұмыстарға белсенді атсылысқан студенттерді ынталандыру. 

Марапаттау кешінде алғаш сөз тізгінін алған ректор өкілі Наджи Генч оқу жылы көлемінде белсенділік танытқан барлық студенттерге өз алғысын жеткізді. 

«Оқу ордамыздың өсіп-өркендеуі тікелей жастарға байланысты. Бұл қос мемлекет үшін де, әлем үшін де маңызды. Жастық шақтарыңызды тиімді пайдаланып, өмірлеріңіз сапалы өткізуге тырысыңыздар. Сіздер сияқты жалынды жастарымызбен мақтанамыз» - деді ректор өкілі. 

Бұдан әрі, сахнаға алғашқы марапат иелері шақырылды. Ректор өкілі Наджи Генч оқу жылы көлемінде университетіміздің спорт саласын дамытуға үлесін қосып, әлемдік, халықаралық және республикалық жарыстарда абыройымызды асқақтатып жүрген жаттықтырушылар мен үздік спортшы студенттерді марапаттады.

Сондай-ақ, ректор өкілі жиналған көпшілікпен бірге «Үздік студент», «Үздік студенттік деканат», «Үздік клуб», «Үздік студенттік декан», «Үздік төраға» номинацияларын иелерін анықтап, жеңімпаздарға арнайы дайындалған статуэтканы табыс етті.

Оқу орнымыздың Академиялық мәселелер вице-ректоры Эльмира Қайсарбайқызы мен Әлеуметтік-мәдени даму вице-ректоры Асқар Тұрғанбаев та сахна төріне шығып, студенттерге ізгі тілектерін айтты. Вице-ректорлар «Үздік спортшы», «Үздік белсенді», «Үздік волонтер», «Үздік капитан», «Үздік амбассадор», «Үздік гид», «Үздік медиа жұлдызы», « Үздік би тобы», «Үздік дәстүрлі әнші», «Үздік музыкант», «Үздік эстрада әншісі», «Үздік жүргізуші» номинацияларының иегерлерін марапаттады.

Бұдан өзге, марапаттау рәсімінде «Жыл жаналығы», «Жыл балмұздағы», «Үздік мобилограф», «Үздік жатахана бөлмесі», «Үздік ардагер белсенді», «Үasawі Face», «Үздік диктор» сынды, жалпы саны 30-дан астам номинация өз иесін тапты.

Сонымен қатар білім ордамызда өз белсенділігімен көзге түсіп, студенттік өзін-өзі басқару ұйымының дамуына елеулі үлес қосқан белсенді жастар, студенттік деканаттар мен ұйымдарға да алғыс хаттар табысталды.

Мерекелік шарада «Би сұлтан» би ансамблі мен күміскөмей әнші жастар өз өнерлерін ортаға салып, кештің сәнін келтірді.