Жаңалықтар

Бүгін университетімізде 2023-2024 оқу жылының соңғы Сенат мәжілісі өтті. Жиынға Сенат мүшелері, құрылымдық бөлім басшылары, оқытушы-профессорлар құрамы қатысты.

Басқосу университетіміздің оқытушы-профессорлар құрамын мерейтойларымен, әрі өзге де жетістіктерімен құттықтау рәсімімен бастау алды.

Университет ректоры Жанар Темірбекова университетімізге қарасты Еуразия ғылыми-зерттеу институтының шетелдік зерттеушісі, PhD, доцент Нұрлан Кенжеахметовке «Құрметті профессор» академиялық атағын табыстады. Сонымен қатар, Сырым Баденовичті ҚР Мәдениет және ақпарат министрлігінің «Мәдениет саласының үздігі» медалімен, Қазақбай Абдуалиевичті 63 жасымен, ал Гулнара Ташполатқызын зейнет жасымен құттықтады. Ардақ Бостанова мен Толқын Сұлтанқызы және Алтынай Маханбетқызы, Айгүл Дөненбайқызын мерейлі 50 жасқа толуымен құттықтап, сый-сияпаттар табыстады.

Бұдан әрі күн тәртібіндегі негізгі мәселелер бойынша баяндамалар жасалды. Ректор Жанар Темірбекова университеттің 2022-2026 жылдарға арналған стратегиялық даму жоспарының орындалуы туралы баяндады. Стратегиялық даму, рейтинг, бақылау және сапа орталығының басшысы Салтанат Қырықбаева 2023-2024 оқу жылындағы оқытушы-профессорлар құрамының ішкі рейтинг нәтижелерін қорытындылау туралы, Академиялық мәселелер вице-ректоры Эльмира Идрисова 2024-2025 оқу жылына профессор-оқытушылар құрамының жылдық жүктеме мөлшерін талқылау, бекіту жайлы айтты.

Сондай-ақ, 2024-2025 оқу жылының Академиялық күнтізбесін бекіту, 2023-2024 оқу жылындағы көктемгі сессияның қорытындысы, Магистранттар мен докторанттардың тақырыптары мен ғылыми жетекшілерін бекіту және өзгерістер мен толықтырулар енгізу, Қожа Ахмет Ясауи атындағы Халықаралық қазақ түрік университетінің оқу процесінде жасанды интеллектті (ЖИ) қолдану жөніндегі іс шаралар бағдарламасын бекіту сынды т.б маңызды мәселелер қаралды.