Жаңалықтар

Бүгін оқу ордамызда Пайғамбарымыз Мұхаммедтің(с.ғ.с) туған күніне орай – «Мәуліт береке бастауы» атты тәрбиелік кеш өтті. Айтулы іс-шара Теология факультеті мен Ясауи ғылыми зерттеу институтының ұйымдастыруымен жүзеге асты.

Ең алдымен, қонақтарға гүл шоқтары мен тәрбиелік мәні бар жазбалар және де тәттілер ұсынылды. 

Рухани жиын әуелі мұсылман жұртының қасиетті мәтіні – Құран Кәрім оқуымен бастау алды. 

Іс-шарада алғашқы сөзді бастаған Әлеуметтік мәдени даму вице-ректоры Еділ Төлегенов Мәуліт айымен баршаны құттықтады. Сондай-ақ, Теология факультетінің студенттеріне мамандықтың маңызы мен жарқын болашағы жайлы ойымен бөлісті. 

Кеш білімгерлердің Мұхаммед Пайғамбарға арнауымен жалғасты. Студенттер пайғамбарымызға Мәуліт оқыды. «Хикметшілер» тобы Қожа Ахмет Ясауи бабамыздың хикметтерін жырлады. 

Шара барысында Хазіреті Мұхаммедке салауаттар айтылып, өнегелі өсиеттер айтылды. Қатысушыларды үлкен әсерге бөлеген факультет студенттерінің тәрбиелік мәнге толы сахналық қойылымы болды. 

Көрермен қауым студенттердің өнеріне дән риза болып, білім жолында табыстарға жетулеріне тілек білдірді. 

Жиын соңында  сұрақтарға дұрыс жауаптар берген азаматтарға сыйлықтар үлестірілді.