Жаңалықтар

Университетіміздің Спорт және өнер факультетінің талантты білімгерлеріне еліміздің белгілі өнер саласының майталмандары мастер-класстар өтті.

Атап айтқанда, Т.Жүргенов  атындағы қазақ ұлттық өнер академиясының доценті, Өнертану кандидаты Амангелді Мұқан «Актерлік өнер» мамандығы бойынша «Актерлік шеберлік» пәнінен мастер-класс өткізді. Ал, «Дәстүрлі музыка өнері» мен «Музыкалық білім» мамандықтарына Құрманғазы атындағы Қазақ ұлттық консерваториясының Халық музыкасы факультеті, Көне аспаптар кафедрасының доценті, ҚР Мәдениет саласының үздігі, белгілі сазсырнайшы, педагог Гүлфайруз Далбағай мен шәкірттері Айгерім Өтеген, Айзада Қабдыкаримова «Түркістан топырағынан түлеген Сазсырнай» атты арнайы дәрісі мен шеберлік сыныбын өтті.

Қадірлі қонақтар, ең алдымен ректор Жанар Темірбековамен кездесті. Қазақ өнері мен мәдениеті жайлы сүбелі сұхбат құрды.

Келесі кезекте, Амангелді Мұқан мен Гүлфайруз Далбағай факультеттің оқытушы-пофессорлары және студенттерімен басқосты. 

Гүлфайруз Далбағай сазсырнай аспабының тарихын кеңінен баяндап, аспаптың құрылымын, орындау техникаларын түсіндірді. Сондай-ақ, шәкірті Айзада Қабдыкаримова аспапта күй ойнап, қоңыр үнімен баршаның жүрегін жаулады.

«Тастауық», «Құс сайрауық», «Қоссаз», «Шыңырау» сынды өзге де көпшілік біле бермейтін, саздан жасалатын аспаптарды таныстырды. Әр аспапта жеке-жеке күй мен шығармаларды орындап, әсем үнін естіртті. Бұл аспаптардың тарихын ғана емес, өзіндік ерекшеліктерін жіктеп айтты. 

Ал, Амангелді Мұқан театр өнері жайлы кеңінен баяндады. Құрмет-қошеметпен қарсы алған оқу орда басшылығы мен ұжымына ыстық ықыласын білдірді.

Сонымен қатар, қонақтар университет кітапханасына өздерінің «Сазды мұра», «Сазсырнай аспабына арналған  хрестоматия», «Ұлт театрының атасы», «Театрда туған толғамдар» атты кітаптарын сыйға тартты.

Факультет деканы  Алпамыс Рахымжанов қонақтарға ризашылығын жеткізді. Осы кездесуді ұйымдастырып, қолдау көрсеткен университет басшылығына алғыс айтты.

Осылайша, өнер майталмандары студенттерге мастер-класстар өтіп, өз тәжірибелерімен бөлісті.