Жаңалықтар

Түркия Республикасында іс-сапармен жүрген ректор Жанар Темірбекова Анкара қаласындағы Гази университетіне арнайы барды.

Гази университеті – Анкарадағы ең үлкен, сәулеті келіскен, 45 мыңнан аса студенті бар, белді мекеме. Университетіміздің серіктесі ретінде қаншама жылдан бері ортақ жобаларды бірлесе жүзеге асырып келе жатқан білім ордасы.

Ректор Жанар Темірбекова Гази университетінің жаңадан тағайындалған ректоры – Угур Үналмен танысып, жаңа лауазымымен құттықтады. 

Кездесу барысында қос университеттің ортақ жобалары сараланып, болашаққа жаңа жоспарлар құрылды. Ректорлар университеттер арасындағы  серіктестікті нығайту мен білім-ғылым алаңын дамыту бойынша тың идеяларды талқылады.

Жиында университеттердің тарихи-география алаңы мен мұрағат жұмыстары бойынша атқарып келе жатқан жұмыстары сөз болды. Угур Үнал Түркияның мемлекеттік мұрағатын басқарып, бір жүйеге келтіру кезінде жасаған жұмысы мен өз тәжірибелері туралы ой бөлісті. Сондай-ақ, өзінің Қазақстанда бірнеше рет болғанын айтып өтті. Еліміздегі жаңа реформаларды, өзгерістер мен жаңалықтарды назардан тыс қалдырмайтынын жеткізді. Бауырлас мемлекет ретінде, Қазақстанның қарыштап дамуына қуанышты екенін айтты.

Осылайша, оқу орда басшылары тек екі университет арасындағы ынтымақтастық жөнінде емес, елдер арасындағы достық көпірі туралы да  сүбелі сұхбат құрды.