Жаңалықтар

Бүгін университетімізде «Түркі әлемі және Пір Түркістан: Ясауи жолы мен мұрасы» атты жиын өтті. Іс-шараға Түркиядан арнайы келген 22 адамнан тұратын академиялық делегация мен оқу орнымыздың ұжымы қатысты. 

Жиында Ахмет Ясауидің мәдени мұрасы мен бұл мұраның түркі дүниесіндегі орны, түркі халықтары арасындағы бірлікті нығайту және бұл құндылықтарды жастар арасында насихаттау мәселелері талқыланды.

Жиында Анкара Хажы Байрам Вели университеті ректорының орынбасары, профессор, доктор Метин Орбай бұл кездесудің маңызы мен университетаралық ынтымақтастық тақырыбына тоқталды. Жоба үйлестірушісі, аталған университеттің оқытушысы, профессор, доктор Садуллах Гүлтен баяндама жасады.

Айта кетейік, қонақтар жиын алдында ректордың арнайы қабылдауында болып, Халықаралық қазақ-түрік университетінің түркі дүниесіндегі миссиясы мен маңызы туралы әңгімелесіп, ректорымызға осы саладағы еңбегі үшін алғыс білдірді. 

Ресми кездесуден кейін делегация университет аумағын аралады. Мәдениет орталығындағы музей мен жаңадан ашылатын көрмені тамашалап, тілек кітабына лебіздерін жазып қалдырды.

Бауырлас елден келген ғалымдардың сапары — Ясауи мұрасын дәріптеу мен түркі әлемінің академиялық қауымдастықтағы ынтымақтастығын нығайту жолында маңызды қадам болды.