Университетіміз бен Құқық алаңындағы 6 мемлекеттік мекеме өзара ынтымақтастық туралы меморандумға қол қойды. Әрі бүгін оқу ордамыздың Заң факультетінде «Заң клиникасы» ресми түрде ашылды. Бұл туралы маңызды басқосуда ректор Жанар Темірбекова мәлімдеді.
Заң клиникасы – студенттеріміздің теориялық білімін нақты істермен ұштастыратын, азаматтарға құқықтық көмек көрсететін, ал ең бастысы – Ясауи іліміндегі адамға жанашырлық, әділетке адалдық, жауапкершілік қағидаларын құқықтық тәжірибеге енгізетін тәжірибелік білім беру алаңы.
Жиын басында сөз алған ректор Жанар Темірбекова «Тәрбиеден тағылымға, теориядан тәжірибеге: Ясауи ілімі және Заң клиникасы» тақырыбында баяндама оқыды.
«Біздің мақсат – Түркі әлемі үшін құқықты терең білетін ғана емес, рухани кемел, қоғамға қызмет ету миссиясын сезінетін мамандарды қалыптастыру. Заң клиникасы осы мақсатқа жетудің негізгі тетіктерінің бірі болып, академиялық білім, кәсіби дағды және рухани құндылықтардың біртұтас моделін ұсынады»,-деді Жанар Темірбекова.
Келесі кезекте, ректор Жанар Темірбекова мен Түркістан облысының Әділет департаментінің басшысы Нұржан Махамбетов, Түркістан облыстық адвокаттар алқасының төрағасы Қайрат Қамбаров, Түркістан облысының нотариалдық палатасының төрағасы Раимқұл Исахов, Түркістан-Қызылорда облыстары бойынша өңіраралық заң консультанттары палатасының төрағасы Айгүл Орақбаева, Түркістан облысының сот сараптама институтының директоры Шоқан Тасыбаев, Түркістан облысының жеке сот орындаушылары өңірлік палатасының төрағасы Мақсат Сауран меморандумға қол қойды.
Жоғарыда аталған 6 мекеме – құқық саласындағы ең беделді құрылымдар. Алдағы уақытта меморандум аясында студенттер аталған мекемелерде тәжірибеден өтеді. Тараптар бұл болашақ заңгерлерге жол ашып қана қоймай, қоғам үшін де үлкен игілік әкелетін бастамаға айналады деген сенім білдірді.
KZ
TR
EN
RU
