Бүгін оқу ордамызда Ғылым айлығы аясында 27-30 сәуір күндері аралығында өткен ғылыми сенминарлар сериясы өз мәресіне жетті.
Семинарлар сериясының басты мақсаты – профессор-оқытушылар құрамы мен жас ғалымдардың ғылыми жобаларды әзірлеу, халықаралық және ұлттық гранттық бағдарламаларға өтінім беру бойынша кәсіби құзыреттерін арттыру.
Семинарлар сериясы барысында қатысушыларға ғылыми жобаларды әзірлеудің негізгі кезеңдері, жоба идеяларын қалыптастыру, өтінім құрылымын жүйелеу, бағалау критерийлеріне сәйкес құжат дайындау жіті түсіндірілді.
Бұдан өзге спикерлердің ұлттық және халықаралық жобалар аясындағы мүмкіндіктер туралы тағылымды ақпараты, жас ғалымдарға жұмысын жандандыруға серпін берді.
Әсіресе, Erasmus+ бағдарламасы аясындағы жобаларға өтінім беру үдерісі кеңінен түсіндірілді. Спикер өтінім дайындау барысында конкурс талаптарымен алдын ала танысу, бағдарлама нұсқаулықтарын мұқият зерделеу, өтінім формаларын қарау және уақытты тиімді жоспарлау туралы айтты.
Сонымен қатар жобалық өтінімнің әкімшілік және техникалық бөлімдері, мазмұндық құрылымы, KPI көрсеткіштері мен қаржылық жоспарлау мәселелері бойынша тәжірибелік кеңестер ұсынылды.
Семинар спикерлері ғылыми жобаларды әзірлеу – жүйелі дайындық пен ұжымдық жұмысты талап ететін ұзақ процесс екенін атап өтті. Осыған байланысты қатысушыларға ғылыми идеяларды нақтылау, мәтіндерді сапалы әзірлеу және жобаларды мерзімінен кешіктірмей тапсыру жөнінде кеңес берді.
Жиын соңында қатысушылар жаттығулар жасап, тест сұрақтарына жауап берді. Белсенділік танытқан жас ғалымдар, жас зерттеушілер мен оқытушылар тестілеу қорытындысы бойынша алғашқы үштікке еніп, Erasmus+ бағдарламасы кеңсесінің үйлестірушісі ұсынған сый-сияпатқа ие болды.
Шара соңында Ғылым департаментінің директоры Хайрулла Масадиков университет басшылығы атынан семинарлар сериясында құнды ақпараттарын бөліскен барша спикерлерге алғыс хат табыстады.
KZ
TR
EN
RU
